ಶ್ರೀ ಸಿದ್ದಲಿಂಗ ದೇವರು

12ನೇ ಪೀಠಾಧಿಪತಿಗಳಾದ ಶ್ರೀ ಸಿದ್ಧಲಿಂಗ ಮಹಾಸ್ವಾಮಿಗಳು 25 ವರ್ಷಗಳವರೆಗೆ ಮಠದ ಘನಪರಂಪರೆಯನ್ನು ಮುನ್ನಡೆಸಿ ಧರ್ಮ ಸಂಸ್ಕಾರ ನೀಡಿ ಜನಮನದಲ್ಲಿ ನೆಲೆ ನಿಂತವರು. ಪೂಜ್ಯರು ದಿನಾಂಕ : 12-02-2020 ರಂದು ಲಿಂಗ ಬೆಳಗಿನಲ್ಲಿ ಬೆರೆತರು. ಶ್ರೀ ತೋಂಟದ ಸಿದ್ಧಲಿಂಗೇಶ್ವರ ಪರಂಪರೆಯ ಗದುಗಿನ ಜಗದ್ಗುರು ಡಾ. ತೋಂಟದ ಸಿದ್ಧರಾಮ ಮಹಾಸ್ವಾಮಿಗಳವರ ಮಾರ್ಗದರ್ಶನದಲ್ಲಿ ರಾವೂರ ಶ್ರೀಮಠದ ಉತ್ತರಾಧಿಕಾರಿಗಳಾಗಿ ನೇಮಕಗೊಂಡವರು ಶ್ರೀ ಸಿದ್ಧಲಿಂಗ ದೇವರು. ಶಿಸ್ತು-ಸೌಜನ್ಯ-ವಿದ್ಯೆ-ವಿನಯಗಳ ಸಾತ್ರಿಕ ಮೂರ್ತಿಗಳಾದ ಶ್ರೀ ಸಿದ್ದಲಿಂಗ ದೇವರು ಆಧ್ಯಾತ್ಮ ವಿಶ್ವವಿದ್ಯಾಲಯವಾದ ಶ್ರೀ ಶಿವಯೋಗಮಂದಿರ, ಹುಬ್ಬಳ್ಳಿ ಮೂರುಸಾವಿರಮಠ, ಹಾವೇರಿ ಹುಕ್ಕೇರಿಮಠದಲ್ಲಿದ್ದು ವಚನಸಾಹಿತ್ಯ, ಧರ್ಮಸಂಸ್ಕಾರ, ಆಧ್ಯಾತ್ಮಸಾಧನೆ, ಕನ್ನಡ-ಸಂಸ್ಕೃತ ಭಾಷೆಗಳ ಅನುಭವ ಹೊಂದಿ, ಬೆಂಗಳೂರ ಸ್ವಾಮಿ ವಿವೇಕಾನಂದ ಯೋಗ ವಿಶ್ವವಿದ್ಯಾಲಯದಲ್ಲಿ ಯೌಗಿಕ ಪದವಿ ಪಡೆದ ಶ್ರೀ ಸಿದ್ಧಲಿಂಗ ದೇವರು ನಾಡಿನ ಉತ್ತಮ ಪ್ರವಚನಕಾರರಲ್ಲಿ ಒಬ್ಬರಾಗಿದ್ದಾರೆ. ಸತತ ಅಭ್ಯಾಸಿಗಳಾಗಿ, ಬರಹಗಾರರೂ ಆಗಿದ್ದಾರೆ. ತರಣ ಸಾಹಿತ್ಯವನ್ನು ಆಳವಾಗಿ ಅಧ್ಯಯನಗೈದ ಶ್ರೀ ಸಿದ್ಧಲಿಂಗ ದೇವರು ರಾವೂರು ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಪ್ರವಚನ ನೀಡುತ್ತಾ ದುಶ್ಚಟಗಳನ್ನು ಬಿಡಿಸಿ ವ್ಯಸನಮುಕ್ತ ಸಮಾಜ ನಿರ್ಮಾಣದ ಕನಸು ಹೊತ್ತಿದ್ದಾರೆ. ಜನ ಜಾಗೃತಿ ಪಾದಯಾತ್ರೆ ಮಾಡಿ ಜನಮನದಲ್ಲಿ ಸೌಹಾರ್ದಭಾವ ಮೂಡಿಸಿದ್ದಾರೆ. ಗದುಗಿನ ಪ್ರಸ್ತುತ ಜಗದ್ಗುರುಗಳವರ ಆಶೀರ್ವಾದದೊಂದಿಗೆ ಕ್ರಿಯಾಶೀಲ ಯತಿಗಳಾದ ಶ್ರೀ ಸಿದ್ಧಲಿಂಗ ದೇವರ ನಿರಂಜನ ಚರ ಪಟ್ಟಾಧಿಕಾರ ನೆರವೇರಿಸುವ ಸುಯೋಗ ನಾಡಿನ ಭಕ್ತ ಬಂಧುಗಳ ಆಶಯವಾಗಿದೆ. 2023 ಜನೇವರಿ 12 ರಂದು ಆರಂಭಗೊಳ್ಳಲಿರುವ ಯಡೆಯೂರ ಶ್ರೀ ಸಿದ್ಧಲಿಂಗೇಶ್ವರ ಪುರಾಣ ಪ್ರವಚನ 21 ದಿನಗಳವರೆಗೆ ನಡೆಯಲಿದೆ. ಶ್ರೀ ಸಿದ್ಧಲಿಂಗೇಶ್ವರ ವಿದ್ಯಾಭಿವೃದ್ಧಿ ಸಂಸ್ಥೆಯ 40ನೇ ವಾರ್ಷಿಕೋತ್ಸವ, ಹಳೆ ವಿದ್ಯಾರ್ಥಿಗಳ ಸಮಾವೇಶ, ಬಸವ ಕುಟೀರದ ಲೋಕಾರ್ಪಣೆ, ನೆರವೇರಲಿದೆ. ಫೆಬ್ರುವರಿ 1, 2 ರಂದು ವಿಶೇಷ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ನಾಡಿನ ಹಲವಾರು ಪೂಜ್ಯರು, ರಾಜಕೀಯ. ಧುರೀಣರು, ಸಮಾಜ ಸೇವಕರು, ಕಲಾವಿದರು, ಕಲ್ಯಾಣ ನಾಡಿನ ಭಕ್ತಬಳಗ ಪಾಲ್ಗೊಳ್ಳಲಿದ್ದು 3-2-2023 ರಂದು ಶ್ರೀ ಸಿದ್ಧಲಿಂಗ ದೇವರ. ನಿರಂಜನ ಚರಪಟ್ಟಧಿಕಾರ ನಡೆಯಲಿದೆ. ಈ ಪವಿತ್ರ ಸಮಾರಂಭಕ್ಕೆ ಸಮಸ್ತ ಭಕ್ತರು ತನು-ಮನ-ಧನದಿಂದ ಸೇವೆ ಸಲ್ಲಿಸಿ ಬಸವಾದಿ ಶಿವಶರಣರ ಹಾಗೂ ಶ್ರೀ ಸಿದ್ಧಲಿಂಗೇಶನ ಕೃಪೆಗೆ ಪಾತ್ರರಾಗಿರಿ.

• ಶ್ರೀ ಸಿದ್ದಲಿಂಗ ದೇವರು ಪೀಠಾಧಿಪತಿಗಳು ರಾವೂರ ಶ್ರೀಮಠ